Barnakoppseting

HPV-koppseting

HPV er eitt virus, sum er sera vanligt millum ung. Virusið smittar illa, og tú følir ikki, at tú ert smittað/-ur. HPV kann elva til ymisk sløg av krabbameini, bæði hjá kvinnum og monnum.

Fødd/-ur í 2006 ella 2007?

Fram til 31. des. 2026 kunnu 18-20 ára gomul eisini fáa ókeypis HPV-koppseting. Hetta er eitt víðkað tilboð í avmarkað tíðarskeið.

Koppseting móti HPV er partur av barnakoppsetingarætlanini, og mælt verður til, at bæði gentur og dreingir verða koppsett móti HPV, tá tey fylla 12 ár. Øll børn millum 12 og 17 ár kunnu fáa koppsetingina ókeypis. Bílegg tíð hjá kommunulæknanum.

HPV stendur fyri Humant Papillomavirus. Yvir 200 sløg av HPV eru til, og HPV-koppsetingin verjir móti níggju sløgum. HPV er ógvuliga vanligt, og mett verður, at upp til 8 av 10 verða smittað við HPV. Eingin viðgerð er fyri virusið, men í flestu førum berjir kroppurin sjálvur smittuna niður. Hjá uml. 1 av 10 verður smittan tó verandi og kann elva til kyknubroytingar, sum kunnu hava við sær krabbamein í lívmóðurhálsinum, í penis, í innaru og ytru kynsgøgnunum hjá kvinnum, baktarmskrabba og krabbamein í varrum, munnholu ella svølgi. HPV kann eisini elva til kynsfinnur, sum eru vørtur á kynsgøgnunum, hjá báðum kynum.

Tú kanst blíva smittað/-ur, sjálvt um tú brúkar hít, tí virusið kann sita á húðini rundan um kynsgøgnini. Tí kann HPV eisini smitta millum hendur og kynsgøgn, og fleiri verða smittað við HPV, áðrenn tey hava havt samlegu fyrstu ferð.

Koppseting bæði til gentur og dreingir

HPV-koppseting er ætlað bæði gentum og dreingjum og fyribyrgir ymsum sløgum av krabbameini hjá báðum kynum.

HPV og krabbamein hjá kvinnum

Lívmóðurhálskrabbi er vanligasta krabbameinsslagið hjá kvinnum, sum stendst av HPV. Seinastu 10 árini hava 43 kvinnur fingið staðfest lívmóðurhálskrabba í Føroyum (2025). Av teimum vóru 20 yngri enn 45 ár. Harafturat hava 31 fingið staðfest undanstig til lívmóðurhálskrabba. Altjóða kanningar vísa, at HPV-koppseting gevur uml. 90% verju móti lívmóðurhálskrabba, um gentan verður koppsett, áðrenn hon er kynsliga virkin.

HPV elvir eisini til meginpartin av øllum tilburðum av krabbameini í skeiðini (70 %), ytru kynsgøgnunum (50 %), baktarminum (90 %) og í varrum/munnholu/svølgi hjá kvinnum (70 %).

Umframt at verja móti meginpartinum av omanfyri nevndu tilburðum av krabbameini gevur HPV-koppseting uml. 90 % verju móti kynsfinnum, sum eru vortur á kynsgøgnunum.

HPV og krabbamein hjá monnum

Hjá monnum kann HPV elva til krabbamein í varrum, munnholu, svølgi, baktarminum og penis. Serliga er talið á tilburðum av krabba í varrum/munnholu/svølgi hjá monnum vaksið nógv seinastu árini í Norðurlondum, og ein vaksandi partur (uml. 60 %) av krabba í varrum/munnholu/svølgi standast orsakað av HPV-sløgum, sum eru fevnd av koppsetingini. Í grannalondunum er krabbi í varrum/munnholu/svølgi hjá monnum nú vanligari enn lívmóðurhálskrabbi hjá kvinnum.

Eisini í Føroyum síggja vit ein vøkstur í talinum av tilburðum av krabba í varrum/munnholu/svølgi hjá monnum. Seinastu 10 árini hava líka nógvir menn fingið krabba í varrum/munnholu/svølgi sum kvinnur hava fingið staðfest lívmóðurhálskrabba (2025).

HPV er orsøk til nærum allar tilburðir av baktarmskrabba og er orsøk til yvir helvtina av tilburðum av krabba í penis.

Umframt at verja móti teimum sløgum av HPV, sum elva til flestu omanfyri nevndu krabbameinstilburðir, gevur HPV-koppseting uml. 90 % verju móti kynsfinnum, sum eru vørtur á kynsgøgnunum.

Ofta spurdir spurningar um HPV

Nógvir spurningar kunnu stinga seg upp í sambandi við koppseting.

Her kanst tú lesa svarini til nakrar av vanligu spurningunum um HPV og HPV-koppsetinger.